Umabot sa 100 reflector vest ang ipinamahagi ng Sangguniang Kabataan ng Poblacion, Alaminos City sa mga motorcycle riders at kanilang official back riders (OBR) bilang bahagi ng patuloy na kampanya para sa road safety sa komunidad.
Hinati ang mga ipinamahaging safety gear sa 50 para sa motorcycle drivers at 50 para sa OBRs. Ito ay ibinigay sa mga kwalipikadong residente ng Barangay Poblacion na may edad 18 hanggang 30, alinsunod sa mga itinakdang alituntunin ng programa.
Isinagawa ang pamamahagi sa SK Office sa Barangay Poblacion Hall kung saan maayos na dumagsa ang mga benepisyaryo upang makakuha ng libreng reflector vest. Ipinatupad ang “first come, first served” na sistema hanggang sa maubos ang mga nakalaang item.
Ayon sa inisyatiba, layunin nitong mapataas ang visibility ng mga motorista at angkas sa kalsada, lalo na tuwing gabi o sa mga lugar na may kakulangan sa ilaw, bilang pagsuporta rin sa umiiral na ordinansa sa lalawigan na nag-uutos ng paggamit ng reflective vest.
Ang naturang aktibidad ay bahagi ng mas malawak na adhikain ng SK Poblacion na isulong ang disiplina sa kalsada at mapababa ang panganib ng aksidente sa pamamagitan ng pagbibigay ng angkop na kagamitang pangkaligtasan. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
