11 anyos nga bata patay human malumos sa Davao river

Davao City – Napalgan na ang patay’ng lawas sa usa ka batang lalaking nailang si Jason Dawang Muda, 11 anyos, residenti sa Purok 1,Tondo Matina Gravahan, Davao City human kini nalumos sa Davao river kagahapon, September 26, 2022 pasado alas 11:00 sa buntag.

Sa report gikan sa Ecoland Police Station, bandang alas 2:05 na sa hapon sa dihang nakuha sa rescuers ang maong bata apan wala na kini kinabuhi.

Sa imbestigasyon sa Ecoland PNP sa pagpanguna ni Police Major Rosario Aguilar, ang Station Commander maong istasyon, naglingkod ang bata sa balsa nga kawayan ug igo ra naglantaw sa mga bata nga naligo, apan nahulog kini ug nalumos.

Samtang, sa pakighinabi sa DXDC RMN Davao sa inahan sa bata nga si Gina Muda, giingon niini nga gikan ang iyang anak sa eskuwelahan ug wala niya mabantayi nga miadto diay sa sapa.

Kasubo karon ang gibati sa pamilya sa nahitabo sa maong biktima.

RadyoMaN Don Pulayao

Facebook Comments