50 migradwar sa TESDA Bread and Pastry Production NC II

Malampuson ug malipayong migradwar ang 50 ka mga indibidwal sa kursong Bread and Pastry Production (BPP) NC II sa Shrine City Livelihood Promotion and Development Center (SCLPDC) kaniadtong Enero 18, 2023.
Kini nga programa gipahigayon sa Dipolog School of Fisheries ug gihatod sa Technical Education and Skills Development Authority (TESDA) ug sa kagamhanang lokal sa dakbayan sa Dapitan pinaagi sa ispesyal nga alokasyon sa scholarhip ni Senador Ronald “Bato” Dela Rosa alang sa pagbansay sa paggama sa pan, cake ug uban pa nga makatabang sa ilang panginabuhian.
Ang mga ninghuman sa BPP gilangkoban sa 25 ka partisipante gikan sa syudad Dapitan ug ang 25 usab gikan sa lungsod sa La Libertad nga nakabenipisyo sa Scholarship and Student Assistance Program (STEP) ug sila nakadawat sa libre nga training fee ug allowance. Ginaproseso na usab ang ilang starter toolkit nga gilakipan sa mga himan sap agama ug pan nga makatabang kanila sa pagsugod sa ilang negosyo.
Sa mensahe ni Mayor Seth Frederick Jalosjos malipayon niya nga gisaysay nga ang iyang administrasyon naningkamot nga mapagaan ang kahimtang sa panginabuhian sa mga Dapitanon.
Mapasalamaton usab ang Mayor sa TESDA ug kang Sen. Bato sa ilang paghatag ug oportunidad sa mga katawhan nga makakuha ug bag-o nga mga kahanas, kahibalo ug kinaiya alang sa pagprodyus og lokal nga mga pan ug cake nga makatabang sa ilang panginabuhian ug paglambo.
Si TESDA Provincial Director Engr. Alan T. Bacatan, mapasalamaton ngadto kang Mayor Jalosjos sa kanunay nga suporta sa ilang buhatan.
Si Ms. Susan Empeynado, Livelihood Coordinator ug Community Training And Employment Coordinator sa syudad mapasigrabohon nga nipahibalo nga ang mga nigradwar nahugpong alang sa pagtukod sa Dapitan City Bread and Pastry Production Association nga mao ang organisasyon nga magtutok nga ang ilang kahibalo magamit sa panginabuhi. Malipayon usab niya nga gibutyag nga ang maong asosasyon aduna nay tanyag nga trabaho sa lokal nga bakery ug catering nga negosyo.
Gidahom ni Ms. Empeynado nga mahimong rehistrado nga training center ang SCLPDC karong tuiga nga magtanyag sa kurso nga Food Processing NC II, Bread and Pastry Production NC II ug Hilot (Wellness Massage) NC II. Plano usab niya nga mutanyag ug uban pang mga pagbansay nga makatabang sa panginabuhian sa mga Dapitanon.
Mipadayag sa ilang pasalamat ang mga minhuman sama ni Eva Sagario gikan sa syudad sa Dapitan ug Rebecca Testa sa lungsod sa La Libertad kay ang maong kurso usa ka ang-ang alang sa pagkab-ot sa ilang mga pangandoy.
Ang maong programa gitambungan usab nila Executive Assitant sa mayor nga si Mr. Jose Darry Patilano, Konsehal Ricky B. Cuenca sa La Libertad, Ethel Abejero-Comandante nga mirepresentar ni Sen. Dela Rosa ug Licinio Laรฑojan nga Vocational School Administrator III sa Dipolog School of Fisheries. (Liezel Lalangan, Photo by Mark G. Potot | Dapitan City Information Division)
Facebook Comments