Un alegaomente drug addict el ya mata y ya desquartiza consu mismo nana y ya pone pa adentro del bag con el maga pedaso del parte del cuerpo antede de buta na buuc na Sinunuc.
Pero muerto tambien el suspechao despues conele ya tira maga pulis enantes tarde durante ta precura conele manda man surrender pero ya imbisti pa este.
Con el nana ya conose como si Amiroda Nurdelbirut, 72-anio mientras el anac amo si Dondi Alshimar Nurdelbirut, 46.
Asegun con el maga besinos del man nana-y-anac tres dias ya sila nohay mira con el bieha pero ta habla el anac yan confined daw na hospital porcausa enfermo este.
Pero enantes tarde ya puede nota el maga besinos tiene un bag ya lleva buta na buuc si Dondi si porque ya checquia sila con este y ya sale ya lang sila espantao cuando ya descobri con el maga pedaso del cuerpo del bieha y bien yede ya.
El incidente ya reporta dayun na pulis y enseguidas ya responde el maga pulis na lugar y ya precura manda rendi con Dondi.
El negosacion ya comensa alas 3 del tarde pero pasada alas 5 ya lang noquiere pa man surrender si Dondi.
Ya ayuda ya subaha su maga familia para man surredner pero ta para duru este y noquiere man surrender.
Por ultimo ya decidi el maga pulis para aresta conele adentro del casa pero ya imbisti este usando su bolo razon para tira conele el maga pulis y ya muri este dayun.
