Aprubado ni Philippine National Police (PNP) Chief Police Gen. Rodolfo Azurin Jr., ang suspensyon ng paggamit sa Body Mass Index (BMI) bilang bahagi ng computation ng Physical Fitness Test o PFT rating ng mga pulis na kailangan para sa promosyon.
Base kasi sa dating computation, ang BMI ay 30 porsyento ng comprehensive PFT, habang 70 porsyento naman ang PFT performance o pagkumpleto ng takdang bilang ng push-up, sit-up at kilometro ng pag-takbo.
Ayon kay PNP Chief Azurin, may ilang pulis na hindi pumapasa sa Comprehensive PFT dahil sa pagiging mataba o obese kahit pa pasado naman sila sa performance.
Pero sa bagong PFT rating, tanging ang performance na lang ang ikokonsidera.
Sa ngayon, pinag-aaralan din na baguhin ang PFT para gawing Police Agility test na mas naangkop sa pang-araw-araw na pagganap ng tungkulin ng mga pulis.
