Maagang magdadagdag ng police visibility ang Dagupan City Police Office o DCPO sa mga matataong lugar sa lungsod bilang paghahanda sa inaasahang pagdagsa ng publiko ngayong papalapit ang holiday season.
Partikular na tututukan ang mga commercial area, pamilihan, terminal at iba pang lugar na inaasahang dadami ang mamimili at biyahero upang maiwasan ang mga insidente ng krimen.
Kabilang sa mga nakalatag na hakbang ang mas madalas na foot, motorcycle at mobile patrols, gayundin ang checkpoints at intelligence-led monitoring.
Kasabay nito, patuloy ding tinututukan ng pulisya ang mga naitatalang insidente ng pagnanakaw, kabilang ang pagkawala ng motorcycle helmets at mga baterya ng jeepney.
Inaasahang mas paiigtingin pa ang pagbabantay habang papalapit ang panahon na mas maraming tao ang namimili, bumibiyahe at nagtutungo sa mga pampublikong lugar.
Makikipag-ugnayan din ang DCPO sa mga barangay tanod, security personnel at iba pang force multipliers upang mapalawak ang pagbabantay hindi lamang sa sentro ng lungsod kundi maging sa mga komunidad.
Kasabay ng dagdag na deployment, pinapayuhan din ang publiko na maging mapagmatyag sa kanilang mga gamit at agad ireport sa mga awtoridad ang anumang kahina-hinalang aktibidad.
Layunin ng DCPO na maagapan ang posibleng pagtaas ng mga insidente ng krimen bago pa tuluyang dumagsa ang mga mamimili at biyahero sa lungsod ngayong holiday season. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
