DOH hospitals sa Davao Region, fully operational human sa linog

Davao City – Gipahibalo sa Department of Health (DOH) Davao nga padayon nga nag-operate ug luwas na nga ma-access sa publiko ang tanan nilang ospital sa Davao Region luyo sa sunod-sunod nga mga linog nga nasinati sa Davao Occidental ug kasikbit nga mga lugar ning semanaha.

‎
‎Sumala sa DOH, ang Southern Philippines Medical Center (SPMC), Davao Regional Medical Center (DRMC), ug Davao Occidental General Hospital (DOGH) nagpabiling fully operational. Sa Davao Occidental, nagpadayon usab ang DOGH sa paghatag og serbisyo sa mga komunidad nga grabeng naapektuhan sa linog ug nakaserbisyo og anaa sa 170 ka pasyente matag adlaw.
‎

‎Gipadayon usab sa ospital ang pag-atiman sa kapin 50 ka mga pasyenteng naka-admit ug 10 ka mga pasyenteng naga-undergo og hemodialysis aron masiguro nga walay maputol nga serbisyo medikal.
‎

‎Kahinumduman nga niadtong Hunyo 8, gipataas sa DOH Davao ang Code White Alert ug gipakusog ang koordinasyon sa mga lokal nga panggamhanan ug health workers aron matubag ang mga insidente ug panginahanglan sa panglawas sa mga pasyente human sa mga linog.

RadyoMan Wil Duran
‎