PLGU DavNor nagpadala og rescue equipment sa JAS

Davao del Norte – Nagpadala ang Probinsiyal nga Panggamhanan sa Davao del Norte og mga rescue equipment ngadto sa Jose Abad Santos, Davao Occidental aron mapalig-on ang nagpadayon nga search and rescue operations human sa magnitude 7.8 nga linog nga miigo sa lugar niadtong milabayng Lunes.

Personal nga gihatod sa mga opisyal sa probinsiya ang mga kagamitan aron dali kining magamit sa mga responder sa apektadong munisipyo karong adlawa, Sabado, Hunyo 13, 2026.

Sumala sa talaan sa Office of Civil Defense (OCD), 13 ka indibidwal ang nagpabiling missing hangtod karon, hinungdan nga gipalig-on pa ang pagpangita sa mga posibleng nalambigit sa mga lugar nga grabeng nadaot ug natabonan sa landslide.

Gawas sa rescue equipment, motabang usab ang PDRRMO Davao del Norte sa search and rescue operations ug sa pag-apod-apod sa relief goods alang sa mga residenteng naapektuhan sa kalamidad. Gipakita niini ang panaghiusa sa mga lokal nga panggamhanan aron mapadali ang paghatag og tabang ug pagbangon sa mga komunidad nga naigo sa linog.

RadyoMaN Kareen Beltran
‎