Duha ka indibidwal nga naigo sa kilat sa Maramag, Bukidnon luwas na ang kahimtang

Anaa na sa luwas nga kahimtang ang duha ka mga lalaki human kini naigo sa kilat samtang nagpasilong sa waiting shed nga nahimutang sa gawas sa CMU Campus Market, Musuan, Dologon, Maramag, Bukidnon alas 4:30 Miyerkules sa hapon.

Matud sa Maramag Municipal Police Station nga ang duha ka mga indibidwal nailing nga sila si Aljun Tupas Rafaela, 19 anyos, estudyante nga taga P-8, South Poblacion, Maramag ug si Arnel Saway Garciano, 22 anyos, peddler nga taga Masimag, Don Carlos, Bukidnon.

Nasayran sa PNP nga namasilong ang duha tungod sa kusog nga pagbundak sa ulan apan aksidente kining naigo sa kilat human nga naigo ang atop sa mao nga waiting shed.

Dali nga gidala sa mga security guard sakay sa CMU ambulance sa Bukidnon Provincial Hospital –BPH Maramag ang duha ug karon anaa na sa stable nga kahimtang.

Samtang sa interview sa RMN ngadto kang Yvonne Gabalez sa Philippine Atmospheric Geophysical and Astronomical Administration kon PAGASA gibutyag niini nga ang kilat nagsugod sa cumulonimbus clouds kon kadag-umon nga adunay kilat-kilat ug dalogdog.

Matud ni Gabalez nga kung anaa ang usa ka tawo sa mao nga matang sa panahon mas maayong musulod sa balay o kaha building aron malikayan ang pagka-igo sa kilat.

Gipasabot niya nga ang cumulonimbus clouds adunay sulod nga air molecules ug snow pellets hinungdan nga adunay usahay lugaw nga mag-ulan og snow.

Sigun ni Gabalez nga ang mao nga klase sa dag-om adunay positive o negative charge nga mangita og katagbo nga posibleng mahitabo ang cloud to cloud, cloud to air ug cloud to ground. Ang nahitabo matud pa sa gawas sa CMU campus mao ang cloud to ground nga kasagarang mahitabo ilabina og adunay kahoy, waiting shed ug uban pa nga adunay positive o negative charge.

Facebook Comments