Balete, Aklan – Patay rong sangka eaeaki matapos nga bunaean it botong sa ueo ko Dominggo it gabii sa Sitio Binitinan, Brgy. Oquendo, Balete, Aklan.
Rong biktima nakilaea kay Renato Turnino De Manuel, sa legal nga edad residente it nasambitan nga lugar samtang ro mga ginaturong suspek hay nakilaea kanday Ruperto Modesto, 52-anyos ag Jinky Agodes, 22-anyos ag residente it Sitio Hae-o sa nasambit nga barangay.
Suno kay PSgt. Jameo Mondia it Balete PNP nga may nagpatunga nga argumento sa tunga it magtimbang nga parte matapos nga rayang biktima hay umadto sa baeay ko mga suspek ag nagpang gubat ag maghinambae it mga maeain nga tinaga.
Tag naga pauli eon rong biktima hay imaw ginsundan it daywa ag ginhanot it botong sa ueo nga gintunaan ko anang kamatayon.
May sangka witness man nga ginabuytan rong Balete PNP nga suno sa sugid nana sa kapulisan hay bago pa man matabo rong insidente hay nakadungaw raya sa andang balkon nga uwa magpahayag it iwag ag nakita rong mga suspek nga naga sunod sa biktima.
Samtang suno man kay Ruperto hay pilang gabii eon nga naga inagi sa andang baeay ro biktima ag naga sininggit.
Gin ako man it suspek nga andang ginsusdan rong biktima ag binunaean it botong it makaywang beses.
Sa makaron hay una eon sa paghinakop it Balete PNP ag magapangatubang it nagakaigo nga kaso samtang nakataeana man nga igapaidaeom sa autopsy examination rong bangkay it biktima para masayuran kon ano pa gid ro ibang gintunaan ko anang kamatayon.
