iFM Laoag – Dumalan iti RT PCR test maminsan iti tunggal dua a lawas dagiti empleado ti gobierno probinsial a saan pay a naan-anay a nabakunaan.
Segun ken ni Bise Gob. Cecilia Araneta Marcos, daytoy ti naisaguday iti memorandum ni Gob. Matthew Marcos Manotoc a naawat ti opisinana.
Malaksid iti daytoy, imbatadna a dagiti maseknan nga empleado ti mangibaklay iti magastoda a dumalan iti nasao a COVID-19 test.
Inlawlawag ti bise gobernador a basar iti pammilin ti gobernador a mabalin laeng ti antigen test no saan a dagus nga “available” ti RT PCR test.
Impalgakna a dagiti naminsan pay laeng a nabakunaan wenno nakalpas pay laeng ti umuna a “dose” ket mabalin a saan a dumalan ti RT PCR test no saan pay a nadanon ti aldaw para iti maikadua a “dose” ti pannakabakuna dagitoy.
Pakaseknan daytoy, kuna ti bise gobernador a naiget ti pammilin ni Gob. Manotoc kadagiti department head a masapul a mangisubmitir iti listaan dagiti saan pay a naan-anay a nabakunaan ken dagiti naminsan pay laeng a nabakunaan ti anti COVID-19 kas paset iti naiget a pannakaipatungpal ti nasao a memorandum ken ti pannakamonitor dagiti maseknan nga empleado. ###Bernard Ver, RMN News
