Fully vaxxed nga Dabawenyo wala nabalaka sa BA.2.12 Omicron variant

Davao City – Wala na gibalaka sa usa ka Dabawenyo sa pagsulod dinhi sa Pilipinas sa bag-ong Coronavirus Disease 2019 (COVID-19) Omicron Subvariant nga BA.2.12.

Sa interbyu sa DXDC RMN Davao sa Dabawenyo nga si Josie Salugao, 42 anyos, nga taga Bangkas Heights, Toril, Davao City, gibutyag niini nga wala na kaayo kini nabalaka sa bag-ong variant, dili susama sa kabalaka ug kahadlok niadtong mao pay pagsugod sa COVID-19 pandemic.

“Sa tinuod lang, wala gyud ko nahadlok ana kay mura’g naanad na ko sa COVID. Dili parehas gyud atong pag-unang gawas gyud sa COVID nga hadlok gyud. Karon, mura’g wala lang man,” sulti ni Josie.

Kampante usab si Josie tungod kay bakunado na kini ug ang iyang pamilya batok COVID-19 diin kini makahatag og dugang proteksyon batok sa makatakod nga virus.

Matud ni Department of Health (DOH) Secretary Maria Rosario Vergeire nga posibleng mamahimong hinungdan sa pagsaka sa kaso sa COVID-19 ang maong Omicron variant, diin padayong giawhag ang publiko nga magpabakuna ug magpa-booster.

Ang unang kaso sa BA.2.12 Omicron variant usa ka 52 anyos nga Finnish female. Kini fully vaccinated ug asymptomatic nga niabot sa Pilipinas gikan Finland niadtong Abril 2, 2022.

Dugang sa DOH, aduna kini 44 close contacts nga padayon karong gina-monitor sa departamento.

RadyoMaN Kirby Manzon

Facebook Comments