GMA, hindi makakadalo sa unang SONA ni Pangulong Bongbong Marcos Jr.

Hindi makadadalo sa unang State of the Nation Address (SONA) ni Pangulong Ferdinand “Bongbong” Marcos Jr., si dating Pangulong Gloria Macapagal-Arroyo.

Ito ay matapos na lumabas ang resulta ng RT-PCR test ni Arroyo nitong Sabado kung saan positive pa rin ang dating presidente sa COVID-19.

Ayon kay Erwin Krishna Santos, Chief of Staff ni Arroyo, naunang nagpositibo sa COVID-19 ang dating pangulo noong July 15 sa isinagawang antigen test.


Agad namang sumailalim si Arroyo sa self-quarantine sa ilalim ng pangangalaga ng kaniyang personal physician na si Dr. Martha Nucum.

Sa kabila ng regular na pag-inom ni Arroyo ng mga prescribed na gamot at supplements para sa pasyenteng may COVID-19, positibo pa rin ang resulta nito sa RT-PCR.

Matatandaan namang isa si Arroyo sa mga unang nagkumpirma na personal na pupunta sa unang SONA ni PBBM gayundin si dating Pangulong Joseph Estrada.

Bilang pag-iingat pa rin sa COVID-19, mahigpit na hinihingi sa mga imbitadong bisita sa SONA ang pagpapakita ng kopya ng RT-PCR test, vaccination card at health declaration form.

Ang mga bisita na aabot sa 37 C o higit pa ang body temperature sa pagbubukas ng 19th Congress at sa mismong SONA ay agad namang pauuwiin at hindi na maaaring makapasok sa loob ng Batasan Complex.

Facebook Comments