CAUAYAN CITY – Isinagawa ng Region 2 Trauma and Medical Center (R2TMC) ang ground-breaking ceremony ng four-storey Outpatient Dialysis Center.
Pinangunahan ni Medical Center Chief Dr. Ray Suanding ang seremonya na dinaluhan nina DOH Usec. Dr. Glenn Mathew Baggao, Cagayan Valley Center for Health Development (CVCHD) Regional Director Dr. Amelita Pangilinan, at iba pang mga bisita.
Ayon kay Dr. Saunding, mayroong 76 stations ang naturang gusali kabilang ang 60 regular hemodialysis stations, 6 peritoneal dialysis stations, at 10 isolation stations.
Bukod dito, magkakaroon din ng pharmacy, in-house laboratory, at Malasakit Center ang naturang pasilidad para sa mas epektibong serbisyong medikal.
Layunin ng naturang center na mabigyan ng solusyon ang tumataas na demand para sa kidney care services sa buong Rehiyon Dos.
