Pinalalakas ng Department of Trade and Industry Region 1 (DTI-RO1) ang kakayahan ng mga kawani at katuwang na ahensiya upang higit na maisulong ang pag-unlad ng industriya ng asin sa rehiyon.
Isinagawa ng DTI-RO1 noong Oktubre 5, 2026, sa pamamagitan ng hybrid na pagpupulong, ang Region 1 Salt Focal Persons Meeting na naglalayong palalimin ang kaalaman ng mga itinalagang salt focal person hinggil sa Republic Act No. 11985 o Philippine Salt Industry Development Act.
Nagbahagi rin ng mga impormasyon at teknikal na gabay ang mga katuwang na ahensiya, kabilang ang DENR, BFAR, CDA, DOST, DA, FPA, DTI-EMB at DTI-BOI, hinggil sa mga umiiral na polisiya, programa, regulasyon, oportunidad sa merkado, pananaliksik, teknolohiya at iba pang suportang maaaring makatulong sa sektor ng asin.
Sa pamamagitan ng pagpupulong, inaasahang higit na mapalalakas ang kakayahan ng mga salt focal person na gabayan ang mga lokal na micro, small and medium enterprises (MSMEs), iugnay ang mga ito sa mga kaugnay na ahensiya, at matukoy ang mga oportunidad para sa paggamit ng teknolohiya at pagpapalawak ng merkado.
Layunin ding maisalin sa mga konkretong programa at tulong sa antas ng mga lalawigan ang mga pambansang inisyatiba para sa industriya ng asin.
Patuloy na isinusulong ng ahensiya ang pagpapaunlad ng mga industriya, pagpapalakas sa mga MSME, pagpapalawak ng oportunidad sa merkado, at pagpapatibay ng ugnayan ng pamahalaan at pribadong sektor para sa patuloy na paglago ng industriya ng asin sa bansa. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
