Kapin 100K shabu nasakmit sa buy bust sa Dumoy

Davao City – Sikop ug tanggong sulod sa prisuhan ang tulo ka indibidwal human nadakpan atol sa gipahigayong drug buy-bust operation sa may Medalla, Milagrosa Street, Dumoy, Davao City nga gipanguluhan sa Philippine Drug Enforcement Agency Regional Office XI ug ubang security forces niadtong Marso 20, 2023.

Sumala sa taho sa PDEA XI, naila ang dinakpan nga si Robert Rebil alyas Bugoy, 38 anyos, businessman, drug den maintainer ug lumulupyo sa nasangpit nga lugar human siya napalitan sa operatiba og usa (1) ka pakete sa gituohang shabu nga mutimbang sa usa (1) ka gramo ug mukantidad sa P6,000.00 dayung nadakpan usab ang duha pa ka drug den visitors nga sila Jomar Abule ug Jaypee Javate nga naabtan sa ilang shabu session.

Sa maong operasyon, nasakmit usab sa otoridad ang lain pang upat (4) ka pakete sa mga gituohang shabu nga mutimbang sa kapin kon kulang 14 ka gramo nga mukantidad sa P95,200.00, nagkalain laing drug paraphernalia ug ang buy-bust money.

Kasong pagsupak sa Republic Act 9165 kun Comprehensive Dangerous Act of 2002 ang giandam batok sa mga dinakpan.

Ivy Parido, BACOMM DNSC Intern