Kapin 300 coconut farmers sa Dav Sur, natunolan og serbisyong medikal

Davao del Sur – Moabot sa 300 ka mga mag-uuma sa lubi gikan sa Padada, Davao del Sur ang nakabenepisyaryo sa gihimong Mobile Health Service (MHS) Program sa Philippine Coconut Authority (PCA) Region XI niadtong milabayng adlaw.

Nasayran nga niabot sa 316 ka mga mag-uuma sa lubi ang nahatagan og serbisyo, diin 280 ang nakadawat og komprehensibong konsultasyong medikal ug mga tambal, 153 ang nakadawat og serbisyong optikal ug libreng eyeglasses, ug 92 usab ang nakapahimulos sa mga serbisyong dental.

Nasayran nga ang aktibidad gipangunahan ni Regional Manager Juvy T. Alayon uban ni PCA Davao del Sur Senior Agriculturist Anro P. Masaglang, kauban ang mga agriculturist ug coconut development officers sa paghatud sa mga serbisyong panglawas ngadto sa mga komunidad sa mga mag-uuma sa lubi.

Sa pamahayag sa ahensya, ang malampusong pagpatuman sa Mobile Health Service nagpakita sa padayon nga paningkamot sa PCA nga mapaduol ang mga mahinungdanong serbisyo sa panglawas sa mga mag-uuma ug sa ilang mga pamilya.

RadyoMaN Bien Abanos