Davao City – Giklaro ni Barangay Captain Roderico Llubit nga dili tinuod ang pasangil batok kaniya sa usa ka residente nga sakop sa iyang barangay kinsa miingon nga gibaharan nga dagmalan kini sa kapitan.
Sa interview sa DXDC RMN Davao kang Llubit, kapitan sa Brgy 9-A, miingon kini nga igo ra siya nagpatunga ngadto sa reklamo ni Machier Torrefier, 42 anyos nga taga Lopez Jaena St. ning syudad sa luna nga iyang gipanag-iya ngadto sa mi-okupar sa usa ka eatery.
Dugang ni Llubit, sa unang higayon kalmado pa si Torrefier sa mediation kauban ang iyang gireklamo apan sa ikaduhang higayon, nag dabog-dabog na ang maong complainant gani gina surang-surang matud pa niini ang respondent.
Tambag sa maong kapitan ngadto kang Torrefier nga kinahanglan sundon ang proseso apan imbes na maminaw kini mibahad naman nuon ang complainant nga magpadala og sulat ngadto kang Mayor Inday Sara Duterte-Carpio tungod sa kalangay sa iyang request.
Rason nga miingon si Llubit nga pwede niyang i-block list si Torrefier sa ilang barangay apan iyang giklaro nga wala kini nag bahad nga iyang sagpaon ang maong complainant.
Kahinumduman nga midangop sa San Pedro PNP ang complainant nga si Machier Torrefier human kini alegasyong gibaharan nga dagmalan sa kapitan.
RadyoMaN Abi Bibera
