Mayor Uy: ‘Tug of war’ sa duha ka pamilya angay resolbahon

40

Davao City – Wala mauyoni ni Island Garden City of Samal Mayor Al David Uy ang nahitabong bangi karon sa duha ka kampo sa mga pamilya sa tulo ka manag-igsuon kinsa nakalas ang kinabuhi tungod sa pagpanunggab sa ilang kaugalingong amahan sulod sa ilang panimalay sa Purok 1, Brgy. San Isidro, Babak District, IGACOS.

Gibatbat sa alkalde nga angay magkahiusa inay ipatigbabaw ang ilang mga tensyon niining kumplikadong sitwasyon.

“Nihangyo nako sa barangay nga ipa-settle lang unta kay dili nako ni gusto kay nakadungog naman gud ko’g istorya nga naay tug of war bahin sa nahitabo ug ako gyod ni silang gihangyo nga i-sette ni kay ang LGU gihimo nato ang tanan aron ma-extend ang tanang tabang,” matud sa mayor.

Nagkabangi ang duha ka pamilya human nga kalit mipatim-aw sa haya ang inahan sa mga bata nga si Arlyn ug buot niining ibalhin ang haya sa mga biktima sa Panabo City nga hugtanong gisupak sa mga kabanay ni Joel Nonoy ang amahan.

Nihatag og mando si Uy sa Department of Social Welfare and Development nga lantawon kung kinsay angay mukustodiya sa kinamanghuran kinsa maoy naka-survive sa mangilngig nga krimen inig makagawas na kini sa ospital.

“I instructed the DSWD to analyzed the situation kung naa bay capacity ang ginikanan, katong mama ug kung kaya ba niyang buhion kay usa pod na sa problema nga walay nag-atiman sa mga bata kay mao lagi dili man gyod malikayan nga mangita og panginabuhian so usa na sa lantawon nato,” matud ni Uy.

Gilaraw ni Uy nga paadtuan og mga psychologist ang 4 anyos nga bata kung hingpit na gyod nga maluwas na kini sa grabeng samad sa kalawasan aron matabangan kini nga makarekober sa trauma.

RadyoMaN Aimee Guinita

Facebook Comments