Pinaalalahanan ng lokal na pamahalaan ng Bayambang ang mga residente ng Mangabul Reservation na huwag maglabas ng pera sa sinumang nag-aalok ng karapatan sa lupa o nagsasagawa ng transaksyon nang walang kaukulang awtorisasyon.
Ito ay matapos makatanggap ng ulat ang Municipal Assessor’s Office hinggil sa mga indibidwal na umiikot sa lugar, nagsusukat umano ng mga lupain at naniningil ng ₱5,000 sa mga residente.
Ayon sa Municipal Assessor’s Office, walang awtorisasyon ang mga naturang indibidwal na maningil o mangako ng karapatan sa lupa kapalit ng bayad.
Mayroon umanong talaan ang tanggapan ng mga lehitimong matagal nang naninirahan at nagsasaka sa Mangabul Reservation.
Samantala, patuloy ang pakikipag-ugnayan ng LGU-Bayambang sa House of Representatives at Senado upang maisulong ang batas na magdedeklara sa Mangabul Reservation bilang alienable and disposable land of the public domain.
Mahigpit namang tututukan ng lokal na pamahalaan ang mga ilegal na paniningil at panlilinlang.
Hinihikayat ang mga residente na huwag makipagtransaksyon o magbigay ng pera at agad i-report sa Municipal Assessor’s Office o sa kinauukulang awtoridad ang anumang kahina-hinalang alok.
Ang mga residente namang naging biktima ay maaaring personal na magtungo sa Municipal Assessor’s Office upang maitala ang kanilang reklamo at mabigyan ng gabay sa mga legal na hakbang. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
