Nakatakdang iprisenta ngayong araw ng prosekusyon sa impeachment trial si National Bureau of Investigation (NBI) Regional Director for the Bangsamoro Autonomous Region in Muslim Mindanao (BARMM) Atty. Jeremy Lotoc.
Ayon kay House prosecution spokesperson at Lanao del Sur Representative Zia Alonto Adiong, sesentro ang testimonya ni Lotoc sa resulta ng imbestigasyon ng NBI sa naging banta ni Vice President Sara Duterte kay Pangulong Ferdinand Marcos Jr., First Lady Liza Marcos at dating House Speaker Martin Romualdez.
Sabi ni Adiong, ang magiging testimonya ni Lotoc ay konektado sa testimonya ng una nilang testigo na si NBI Senior Agent John Mark Calilung.
Sa impeachment trial ay sinabi ni Calilung na siya ang nag-authenticate ng mga video recordings at iba pang digital evidence kaugnay sa online press conference ni VP Sara noong November 23, 2024 kung saan niya inihayag na may naka-usap na siyang papatay kay PBBM at iba pang personalidad.
