Binatikos ni House prosecutor at Bicol Saro Party-list Representative Terry Ridon ang pahayag ni Davao City Rep. Paolo Duterte laban sa prosekusyon.
Ayon kay Ridon, walang dahilan para mag-iyak-iyak at mag-nyaw-nyaw ang depensa at si Rep. Paolo dahil sa pag-atras sa tatlong articles of impeachment laban kay Vice President Sara Duterte.
Diin ni Ridon, walang mali at hindi bawal ang nabanggit na hakbang ng prosekusyon na inaprubahan din ng Senate Impeachment Court.
Paliwanag ni Ridon, may batayan at hindi biglaan ang pag-atras ng prosekusyon sa tatlong articles of impeachment ukol sa grave threats, maling paggamit ng confidential funds at panunuhol sa mga opisyal ng Department of Education (DepEd).
Dagdag pa ni Ridon, sa dulo ay ang desisyon ng mga senator-judges ang mananaig kaugnay sa natitirang article of impeachment patungkol sa hindi maipaliwanag na yaman ni VP Sara na hindi nito idineklara sa Statement of Assets, Liabilities and Net Worth (SALN).
