PDEA: Foreign drug rings dakung hulga

32

Davao City – Gi-angkon sa Philippine Drug Enforcement Agency (PDEA) Davao Region nga naka-ugat na og maayo ang mga sindikato sa droga sa Pilipinas ug mao kini ang rason nganong padayon gihapon nga nisiaw ang pagkuyanap sa droga taliwala sa kampanya ni Pres. Rodrigo Duterte.

Sumala ni PDEA-XI Spokesperson Noli Dimaandal nga sukad pa man kaniadto sa dili pa si Duterte ang pamuno-nasud, nakasulod ug nakagamot na og maayo ang duha ka dagkung sindikato sa droga sa nasud.

Kini subay sa gisulti ni Duterte nga ang Bamboo Triad sa Hongkong ug China ug Sinaloa drug cartel sa Mexico ang nagmudmod og suplay sa droga sa Pilipinas.

Apan positibo si Dimaandal nga sa dili madugay matuldukan ra sa hingpit sa PDEA ang suliran sa droga ubos sa administrasyon ni Duterte.

Kini ilabi na kung mo-ayuda ang katawhan sa mga awtoridad sa paggukod sa mga sindikato sa droga pinaagi sa paghatag og mga impormasyon labot sa mga tawong nagpayuhot og ilegal nga droga.

Seryoso ang kagamhanan sa paglingkawas sa nasud gikan sa kalihukan sa international trafficking busa dugang 500 ka personahe ang idugang sa ahensiya aron mas mapakusgan pa ang giyera kontra droga.

Gani ang gobyerno karon naghatag usab og dugang modernong kagamitan sa PDEA sama sa mga armas, bullet-proof vests ug daghan pang uban sa miaging mga buwan.

Kabahin sa gipakusgan nga kampanya, ang PDEA aktibong naghimo og drug symposia sa mga tunghaan ug sa mga barangay aron ipasabot ang dautang epekto sa tawo nga muhithit og shabu, dugang sa maong opisyal.

RadyoMaN Joel Viray

Facebook Comments