PhilHealth-10, nangayo og tabang sa NBI-10 aron imbestigahan ang mga posibleng bugos nga mga transaksyon

Nagpinirmahay og Memorandum of Agreement (MOA) ang Philhealth-Northern Mindanao ug ang National Bureau of Investigation (NBI)-10 aron matabangan ang Philhealth sa pag-imbestiga sa mga posibleng binuang nga transaksyon nga naglambigit sa ilang buhatan.

Sa interview sa RMN Malaybalay ngadto kang Merlyn Ybañez, ang information officer sa Philhealth Region 10, gibutyag niini nga ang mao nga partnership gisilyuhan pinaagi sa MOA signing niadtong Abril 8, 2022.

Gihimo kini aron mapahugtan pa ang ilang paningkamot sa pag-detect sa mga binuang sama sa online fixing, pagpabayad sa ID nga rampant na karon sa social media bisan og libre kining gihatag sa Philhealth.

Gawas niini, apil sa imbestigahan sa NBI mao ang kadudahang health insurance claim, mga fraud ug posibleng wala pag-remit sa mga employer sa premium contributions sa ilang mga empleyado.

Gihimo matud pa nila kini aron maprotektahan ang pondo gikan sa mga miyembro.

Pasabot niya nga wala matud pa silay investigative capability maong nakigtinabangay sila sa NBI.