Pick-up ug truck nagbangga, unom landing sa balay-tambalanan

22
Milanding sa balay-tambalanan ang unom ka mga sakay sa usa ka pick-up human nga mibangga kini ngadto sa katabo nga truck pasado alas 7:40 kagahapon sa buntag didto sa Purok-5, Barangay Palacapao, Quezon, Bukidnon.

Gilangkuban ang maong aksidente sa usa ka Nissan Navarra, nga nagtangag og plakang numero: LGH269 ug gimaneho ni Ramelito Tizon, 54 anyos, minyo, contractor, ug residente sa San Antonio Village, Matina, Davao City batok kini sa usa ka Fuso Aluminum Wing Van nga nagtangag og plaka numero: CBJ4328 ug gimaneho ni Ranel Cavan, 31 anyos, minyo, ug residente sa Purok-9, Tamugan, Marilog, Davao City.

Sumala sa taho sa kapulisan, nga nagdagan sa managlahing direksyon ang duruha ka mga sakyanan, pag-abot sa lugar kung asa nahitabo ang disgrasya, partikular na sa may kurbada nga bahin, na-overshoot ang maong pick-up ngadto sa pikas nga bahin sa dalan hinungdan sa panagbangga.

Nakaangkon og nagkadaiyang bun-og ug pangos sa kalawasan ang mga sakay sa maong pick-up nga giilang sila Ann Tizon, 55 anyos, asawa sa drayber, Rosalinda Pimentel, 54 anyos, katabang, Myra Concon, 56 anyos, magtutudlo, Jojelyn Guibao, 55 anyos, magtutudlo, ug si Aurora Quezon, 58 anyos ug pulos mulopyo sa managlahing lugar sa Davao City lakip na usab ang drayber nga daling gidala sa balay-tambalanan.

Detenado sa pikas nga bahin sa Quezon Municipal Police Station ang drayber sa maong Wing Van alang sa tokmang disposasyon.

Facebook Comments