Tinapos na ng House prosecution team ang presentasyon sa impeachment trial ng mga ebidensya laban kay Vice President Sara Duterte.
Ayon kay House impeachment team adviser and spokesperson Ace Barbers, huling testigo na ng prosecution si financial forensic expert Alexander Cabrera.
Inilahad ni Cabrera na umaabot sa P817.87 million ang hindi umano idineklara ni VP Duterte sa kanyang Statement of Assets, Liabilities and Networth o SALN.
Diin ni Barbers, sa lakas ng mga ebidensya na nailatag ng prosekusyon ay tiwala sila na mahahatulang guilty sa impeachment case si VP Sara at mapapatalsik sa pwesto.
Bunsod nito ay binanggit naman ni House prosecutor at Bicol Saro Party-list Rep. Terry Ridon na “the end is near” o malapit ng matapos ang lahat dahil sa tindi ng mga ebidensyang nagpapakita ng hindi pagkakatugma sa yaman o pananalapi ni VP Sara at mister na si Atty. Manases Carpio at sa kanyang deklarasyon sa SALN.
Giit naman ni House prosecution spokesperson at Lanao del Sur 1st District Rep. Zia Alonto Adiong, lumitaw sa mga dokumento at testigo o testimonya na sinadyang itago ni VP Sara sa taumbayan ang totoong yaman nito na isang betrayal of public trust at culpable violation of the Constitution.
