Ging isturyahan eon sa sesyon it Sangguniang Bayan kung Kalibo kahapon ro preparasyon para sa nagapaeapit nga Ati-Atihan Festival 2018.
Daya hay ging pangunahan ni PSInsp. Honey Mae Ruiz, hepe it Kalibo PNP kung siin naging bisita imaw kahapon sa nasambit nga session.
Suno kara mas pabaskugon nanda ro andang himuon nga seguridad bangod man sa naga katabo makaron sa Marawi City.
Ro mga igabawae sa masunod nga Ati-Atihan hay ro pagbit-bit it mga debotelya nga ilimnon ag pati ro pagbaligya sa festival zone area nga nauna eon man nga ging patuman ko nagtaliwan nga okasyon nga naging positibo man do resulta.
Plano man nga ibawae ro pagbaligya it mga deadly weapon, pagpaeopok it fire crackers ag ro mandatory nga pag-check sa mga backpack sa mga magasueod sa nasambit nga festival zone.
Samtang ipaidaeom man nanda sa profiling ro mga ambulant vendors dahil kaabuan kanda kara hay mga dayo kung siin anda man daya nga isyuhan it ID ag uniform.
Kaangot kara magahimo it mga ordinansa ro Sangguniang Bayan it Kalibo para dikaraya agod nga pormal nga mai-implementa ro andang tinutuyo kada Ati-Atihan Festival.
