Iginiit ni Senate President Win Gatchalian na hindi apektado ang Senate Impeachment Court sa isinampang reklamo ng grupo ng mga abogado na humihiling na ipatigil ang impeachment trial dahil sa pagkwestyon sa validity ng pagkakatalaga kay Senator Chiz Escudero bilang presiding officer.
Ayon kay Gatchalian, hindi sila apektado sa kabila ng pagkwestyon sa nakaupong presiding officer ngayon dahil hindi naman ibinigay ng Korte Suprema ang hinihingi nilang status quo ante-order at temporary restraining order (TRO).
At dahil hindi aniya ibinigay ng Supreme Court ang TRO ay tuloy-tuloy lang ang kanilang impeachment trial.
Bukod dito, sa tingin din ng Korte Suprema ay wala namang magiging irreparable damage sa paglilitis kung si Escudero ang presiding officer.
Samantala, nilinaw ni Gatchalian na hindi bago na may dalawang senator-judge ang nasa rostrum tulad ng set-up nila ngayon ni Escudero.
Inihalimbawa ng senador ang impeachment trial noon ni dating Pangulong Joseph Estrada kung saan magkatabi sa rostrum sina Senate President Aquilino “Nene” Pimentel Jr. at former SC Chief Justice Hilario Davide Jr. dahil Pangulo naman ang pina-i-impeach noon.
Binigyang-diin ni Gatchalian na responsibilidad niya bilang Senate President na tiyaking tuloy-tuloy at maayos ang impeachment proceedings kahit hindi man siya ang nagsasalita at nangunguna sa paglilitis.
