Gitulisok ni kanhi Kagawad Jenelyn Martin kinsa iyaan sa usa sa mga biktima ang tagdumala sa Camp Madeg’ger kay wala matud pa’y gihimo aron tabangan ang mga biktima sa kilat nga nahitabo sulod sa maong kampo sa niadtong adlaw’ng Domingo.
Dismayado si Martin sa tagdumala sa inland resort sa rason walay ni usa kanila ang nanawag og rescuer aron masalba ang unom ka mga batan-on nga naigo sa kilat niadtong panahona.
Segun niini nga kon wala pa siya nahibalo ug nakaabot sa hitaboan wa gayo’y makaabot nga rescuer aron salbahon ang mga biktima apan usa na ka oras ang nakalabay gikan sa hitaboan.
Hinoon aminado kini nga dunay gihimo ang tagdumala sa Camp Madeg’ger pinaagi sa pagsusi sa mga batan-on apan ang gikasakit sa maong iyaan mao nga wala mag-inisyatibo ang management sa paghakwat sa mga biktima gikan sa hitaboan paingon na sa resort na mismo o bisan pagdala sa ospital.
Nagtoo ang kanhi kagawad nga hayan masalba pa unta ang kinabuhi sa unom kon kumpleto palang og kagamitan pang-first aid ug pang-rescue ang naasoy nga resort.
Gani mas milalom pa ang kalain sa mga kabanay kay bisan pag-abot sa punerarya wa’y representante gikan sa Camp Madeg’ger ang nagpatim-aw ug nag-asikaso sa ilang obligasyon human namatay ang unom ka batan-on human sila naigo sa kilat sulod sa premises sa maong resort nga natigayon sa nakalabay’ng pagkilomkilom.
Hangtud karon ning pagbalita, wala pa nagpagula og pamahayag ang tagdumala sa Camp Madeg’ger labot sa maong panghitabo.
RadyoMaN Joel Viray
