Naaresto ng mga tauhan ng Balungao Municipal Police Station (MPS) ang isang 58-anyos na lalaki na kabilang sa Top 2 Most Wanted Persons sa municipal level ng Balungao, Pangasinan, noong Oktubre 6, 2026.
Isinagawa ang operasyon bilang bahagi ng pinaigting na kampanya ng Pangasinan Police Provincial Office (PPO) laban sa mga wanted person sa lalawigan, sa ilalim ng pamumuno ni Police Colonel Dennis L. De Leon, Officer-in-Charge, Provincial Director.
Batay sa ulat, naaresto ang suspek sa bisa ng Warrant of Arrest na may kaugnayan sa dalawang bilang ng Statutory Acts of Lasciviousness. May inirekomendang piyansa na ₱180,000 para sa nasabing mga kaso.
Ang akusado, na isang magsasaka at residente ng Balungao, ay kasalukuyang nasa kustodiya ng Balungao MPS para sa kaukulang dokumentasyon, disposisyon, at pagsasagawa ng mga legal na proseso.
Binigyang-diin ni PCOL De Leon ang patuloy na pagsisikap ng Pangasinan PPO na matukoy at maaresto ang mga wanted person, partikular ang mga indibidwal na nananatiling at large.
Ayon sa Pangasinan PPO, bahagi ito ng kanilang kampanya upang mapanatili ang kaayusan, maipatupad ang batas, at matiyak ang kaligtasan at seguridad ng mga mamamayan sa buong lalawigan. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
