TUCP-Davao City gikadismaya ang dugang 29 pesos nga usbaw sa suholan sa mamumuo

Davao City – Bisan pa man sa gitakdang usbaw nga 29 pesos sa sweldo sa mamumuo sa rehiyon onse, dismayado gihapon ang Trade Union Congress of the Philippines (TUCP) Davao City sa nahimong disisyon sa Regional Tripartite Wages Productivity Board (RTWPB).

Sumala ni Melba Tampakan, Mindanao Recruitment Services Department sa TUCP Davao City, wala sila magkuwang sa paghatag sa mga punto ngadto sa RTWPB, aron mausbawan sa sweldo ang yanong mamumuo sa pribadong sektor.

Dugang ni Tampakan, sa dihang gihatag sa RTWPB ang desisyon sa usbaw sa suholan, ila kining gikadismaya tungod naglaum sila nga dako kinig ikatabang sa katawhan, apan dismayado sila tungod anaa lamang sa 29.00 pesos matag-adlaw.

Segun niya, ilang gipangayo sa 150.00 ngadto sa 200.00 pesos ang dugang suholan sa mamumuo, aron dili kini maglisud sa paglahutay sa matag adlaw nga panginahanglan.

Ingon pa ni Tampakan, ang maong pag-usbaw matawag lang kinig sinsilyo nga dakong kuwang alang sa katawhan, ilabi na nga nagtaas usab ang presyo palaliton sa merkado.

RadyoMaN Bien Abanos