Cauayan City – Nagsagawa ng aerial inspection at site visit ang House of Representatives sa pangunguna ni Speaker Faustino “Bojie” Dy III Northern Sierra Madre Natural Park bilang bahagi ng pinaigting na hakbang para sa pangangalaga at napapanatiling pagpapaunlad ng bulubunduking Sierra Madre.
Sa isinagawang pag-iinspeksyon mula sa himpapawid, sinuri ng mga opisyal ang kalagayan ng mga protected forest, watershed system, biodiversity areas, at mga komunidad na nanganganib sa illegal logging, deforestation, at mga sakunang dulot ng climate change.
Kaugnay nito, isinusulong ni Speaker Dy ang House Bill No. 3538 na naglalayong mabuo ang Sierra Madre Conservation and Development Authority o SMCDA. Layunin ng panukala na pangunahan ang pangmatagalang proteksyon, rehabilitasyon, at wastong pamamahala sa kabuuan ng Sierra Madre mountain range.
Ang Sierra Madre, na umaabot ng mahigit 540 kilometro sa silangang bahagi ng Luzon, ay itinuturing na pangunahing panangga ng bansa laban sa malalakas na bagyo at tahanan ng malaking bahagi ng natitirang kagubatan sa Pilipinas.
Patuloy namang binibigyang-diin ng mga opisyal ang kahalagahan ng pangangalaga rito para sa kalikasan at kaligtasan ng mga susunod na henerasyon.
