Arestado ang limang indibidwal matapos masamsam sa isang buy-bust operation ang nasa 2,899 reams ng assorted illicit cigarettes na nagkakahalaga ng tinatayang ₱4.205 milyon sa Sitio Inansuana, Barangay Lucap, Alaminos City, Pangasinan.
Isinagawa ang operasyon noong Oktubre 3 ng mga tauhan ng Regional Maritime Unit 1 (RMU 1), katuwang ang Bureau of Customs–Sual.
Bukod sa mga nakumpiskang sigarilyo, nakumpiska rin ang dalawang sasakyan at tatlong cellular phones.
Nahaharap ang mga naaresto sa mga paglabag sa Republic Act No. 10643 o Graphic Health Warnings Law, Republic Act No. 10863 o Customs Modernization and Tariff Act, at Republic Act No. 8424 o National Internal Revenue Code of 1997.
Isinailalim naman sa inventory at marking ang mga nakumpiskang ebidensya bilang bahagi ng dokumentasyon at kaukulang disposisyon.
Kabilang dito ang kinakailangang certification mula sa Bureau of Internal Revenue (BIR) at National Tobacco Administration (NTA). | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
