Muling pinaalalahanan ang mga paaralan, magulang, guro at mga mag-aaral tungkol sa Republic Act No. 10627, o Anti-Bullying Act of 2013, na nag-aatas sa mga elementarya at sekondaryang paaralan sa bansa na magkaroon ng mga polisiya at programa para maiwasan at matugunan ang bullying.
Maaaring magkaroon ng iba’t ibang anyo ang bullying, kabilang ang pisikal, berbal, sosyal, at cyberbullying. Maaari itong makaapekto sa kapakanan ng mga mag-aaral at sa kabuuang kalagayan ng school community.
Sa ilalim ng batas, mahalaga ang papel ng bawat sektor sa pagpigil at pagtugon sa bullying. Hinihikayat ang mga mag-aaral na magsumbong sa mga kinauukulan kapag nakaranas o nakasaksi ng bullying, habang inaasahan naman sa mga magulang na makinig, gumabay at suportahan ang kanilang mga anak.
Responsibilidad din ng mga school authority na ipatupad ang kanilang anti-bullying policies, magsagawa ng mga hakbang para maiwasan ang bullying, at tumugon nang naaayon sa mga naiulat na insidente.
Kaugnay nito, hinihikayat ang lahat na isulong ang kabaitan, respeto, inclusivity at responsableng paggamit ng internet upang makabuo ng mas ligtas na kapaligiran para sa mga mag-aaral. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
