Isang munting hakbang para sa kalikasan, ngunit may mahalagang mensahe para sa mga pet lover.
Ito ang ipinakita ni Idol Denyvon Lagasca, residente ng Bayambang, Pangasinan, matapos boluntaryong isuko ang alagang pares ng budgerigar o budgie noong Oktubre 13, 2026.
Ayon sa Municipal Environment and Natural Resources Office o MENRO, kinuha ng mga wildlife enforcement officer ang mga ibon sa Barangay Nalsian Sur at pormal na itinurn-over sa Department of Environment and Natural Resources o DENR-CENRO Dagupan noong Oktubre 14 para sa wastong pangangalaga.
Sa likod ng pagsukong ito ang paalala na ang pag-aalaga ng mga ibon ay may kaakibat na responsibilidad, lalo na pagdating sa pagtiyak na legal ang pinagmulan ng mga ito at kumpleto ang kanilang mga dokumento.
Ipinaalala ni MENRO Officer Ma-Lene S. Torio na sa ilalim ng Republic Act No. 9147 o Wildlife Resources Conservation and Protection Act, dapat sundin ang mga patakaran sa pangangalaga at pagmamay-ari ng wildlife, kabilang ang pagkuha ng mga kinakailangang permit at dokumento.
Dahil dito, hinihikayat ang mga pet lover na tiyaking may legal na pinagmulan at kumpletong papeles ang mga ibong kanilang inaalagaan.
Para sa mga may alagang ibong walang kaukulang dokumento, maaaring makipag-ugnayan sa MENRO upang malaman ang mga nararapat na hakbang.
Sa huli, ang pagiging responsableng tagapag-alaga ay hindi lamang nasusukat sa pagbibigay ng pagkain at tirahan sa mga alagang hayop, kundi sa pagtiyak na ang pag-aalaga sa mga ito ay alinsunod sa batas at may paggalang sa kalikasan.
Isang paalala na sa bawat munting hakbang ng pananagutan, may pagkakataong makatulong sa pangangalaga ng wildlife at sa pagpapanatili ng balanse ng kalikasan. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
