Inusisa ng defense team ang mga confidential activities at engagements ni Vice President Sara Duterte para sa unang quarter ng 2023 na inihanda ni Col. Raymund Dante Lachica na head ng Vice President Security and Protection Group (VPSPG).
Nakasaad sa certification na inisyu ni Lachica na isinagawa ang mga surveillance at information gathering sa 127 areas sa 1st quarter at 111 areas sa 2nd quarter ng 2023.
Tinukoy ni Atty. Kristine Ferrer ng defense team na naunang sinabi ni Commission on Audit – Intelligence and Confidential Funds Audit Office (COA-ICFAO) State Auditor Xylene del Campo kahapon na hindi pasok sa confidential activities para sa paggamit ng confidential funds ang mga inilistang engagements ng Office of the Vice President (OVP) sa ilalim ng 4.8.5 ng Joint Circular 2015-01.
Gayunman, sa ilalim ng summary of intelligence work sa ilalim ng Protective Intelligence Operations Report (PIOR) ay nakalista ang mga activities na kinumpirma ni Del Campo na pasok sa intelligence at surveillance works.
Kabilang dito ang liaising o pakikipag-ugnayan sa mga intel operatives at informants ng Philippine National Police (PNP) para sa threat assessment sa lugar na pupuntahan ng bise, intelligence fusion para sa threat assessment at update sa sitwasyon, profiling ng mga participants na dadalo ng events, at deployment ng intel operatives at informants sa mga dadaanan at pagdadausan ng event.
Ipinakita rin ni Ferrer ang 2nd at 3rd quarter na listahan ng engagements ni VP Sara na sinangayunan naman ni Del Campo na parte ng surveillance activities.
Nagkaroon naman ng pagtatalo sina Ferrer at Atty. Lorna Kapunan ng prosecution team tungkol sa paraan at limitasyon lang ng cross-examination ng panig ng respondent.
