Dalawang pinaghihinalaang sangkot sa ilegal na droga ang naaresto sa isinagawang buy-bust operation ng Mangaldan Municipal Police Station (MPS) katuwang ang Philippine Drug Enforcement Agency (PDEA) Regional Office 1 sa Barangay Embarcadero, Mangaldan, Pangasinan noong Hunyo 20, 2026.
Ayon sa ulat, isinagawa ang operasyon bandang alas-2:40 ng madaling araw sa pangunguna ng Intelligence Operatives at Drug Enforcement Team (DET) ng Mangaldan MPS. Nagresulta ang operasyon sa pagkakaaresto ng dalawang suspek na kapwa residente ng San Jacinto, Pangasinan.
Narekober mula sa mga suspek ang isang heat-sealed transparent plastic sachet na naglalaman ng hinihinalang shabu na ipinagbili sa poseur buyer. Nasamsam din ang isang tunay na Php1,000 bill na ginamit bilang buy-bust money sa operasyon.
Tinatayang may bigat na 0.4 gramo ang nakumpiskang hinihinalang shabu na may Standard Drug Price (SDP) na nagkakahalaga ng Php2,720.00.
Kaagad na ipinaalam sa mga suspek ang dahilan ng kanilang pagkakaaresto at binasa sa kanila ang kanilang mga karapatang naaayon sa Saligang Batas sa wikang kanilang nauunawaan.
Isinagawa rin ang pagmamarka at imbentaryo ng mga nakuhang ebidensya sa mismong lugar ng operasyon sa harap ng mga suspek at mga kinakailangang saksi, kabilang ang kinatawan ng media at isang barangay kagawad ng Barangay Embarcadero.
Matapos ang operasyon, dinala ang mga suspek at mga nakumpiskang ebidensya sa Mangaldan Municipal Police Station para sa wastong dokumentasyon. Sumailalim din ang mga suspek sa pisikal na pagsusuri sa Mapandan Community Hospital habang ipinadala naman ang nakumpiskang hinihinalang ilegal na droga sa Urdaneta City Satellite Forensic Unit para sa laboratory examination.
Kasalukuyang inihahanda ng mga awtoridad ang kaukulang kaso laban sa mga naarestong suspek dahil sa paglabag sa Republic Act No. 9165 o ang Comprehensive Dangerous Drugs Act of 2002. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
