Davao City – Padayon ang ginahimong hot pursuit operation sa kasundaluhan aron magukod ang mga sakop sa New People’s Army kun NPA kinsa ilang nakaengkwentro sa Sitio Kinawasan, Brgy. San Isidro, Lupon, Davao Oriental niadtong Abril 26 alas 3:45 sa hapon.
Kini ang gibutyag ni Civil Military Operations officer sa 701st brigade Philippine Army Capt. Rayboy Ibañez atol sa pakighinabi sa DXDC RMN Davao kaniya.
Una ng gipagula ang report gikan sa Police Regional Office kun PRO XI nga adunay usa ka sundalo ang namatay sa nasangpit nga engkwentro nga giilang si CPL Ruel Bayog Ompog 28th Infantry Battalion Philippine Army.
Matud pa nagka-engkwentro ang Scout Platoon sa 28th IB nga gipanguluhan ni 2LT Versoza ug ang kapin kun kulang 15 ka mga wala pa mailhing teroristang New People’s Army kun NPA.
Dugang ni Ibañez, subling miulbo ang engkwenrto kagahapon sa alas 3 sa hapon nga milungtad sa pulo ka minuto nga binayloay og bala.
Hinuon sumala niya walay napagan sa bahin sa gobyerno sa maong engkwentro samtang wala pa nila nasuta og aduna bay casualties sa pikas pundok sa engkwentro niadtong miaging adlaw ug kagahapong adlawa.
RadyoMaN Renz Barbarona
