Hinihintay pa ng vaccine expert panel ang iba pang clarifications at ilang dokumento mula sa Sinovac para maaprubahan na ang kanilang aplikasyon para sa Emergency Use Authorization (EUA).
Sa Laging Handa public briefing, sinabi ni Food and Drug Administration (FDA) Director General Usec. Eric Domingo, kasama rin sa hinihintay nila ay ang kopya ng conditional approval ng China sa Sinovac, para masuri na rin ito.
Sa ngayon, sinabi ni Domingo na hindi pa niya nakikita ang rekomendasyon ng vaccine expert panel sa ginagawang evaluation sa Sinovac, bagama’t ang edad kung saan posibleng gamitin ito ay nasa 18 hanggang 59 years old lamang.
Kasalukuyan aniyang sinusuri ng FDA ang datos sa safety and efficacy ng Sinovac sa older population.
Sa kaso naman ng Gamaleya at Bharat, sinabi ni Domingo na hinihintay pa rin nila ang ilan pang isusumiteng dokumento na may kaugnayan sa kalidad ng kanilang produkto.
