Umabot na sa mahigit 53,000 “students-in-crisis” ang nakatanggap ng educational assistance mula sa Department of Social Welfare and Development (DSWD) sa unang araw ng pamamahagi nito noong Sabado.
Sa datos na ibinahagi ng DSWD sa Facebook page nito kaninang umaga, umabot na P154 million ang halaga ng naipamahaging one-time cash aid ng ahensya para sa mga estudyante.
Ang tulong ay nakapaloob sa Assistance to Individuals in Crisis Situations (AICS) program ng DSWD na layong tulungan ang mga students-in-crisis na kinabibilangan ng mga sumusunod:
Breadwinner
Working student
Inabandona ng mga magulang at nakatira sa mga kaanak
Anak ng single parent
Anak ng mga magulang na walang trabaho
Anak ng mga ofw
Biktima ng child abuse
May mga magulang na mayroong hiv at;
Biktima ng kalamidad
Maaari ring makatanggap ng ayuda maging ang mga estudyanteng nag-aaral sa private schools basta’t nakararanas sila ng krisis pinansyal.
Isasagawa ang payout ng educational assistance hanggang sa September 24.
