Nagtataka ang House prosecution panel kung bakit kailangang gamitin pa ang confidential funds para sa seguridad ni Vice President Sara Duterte gayong mayroon itong Vice Presidential Security and Protection Group (VPSPG) na may 400 tauhan at may hiwalay na pondo.
Sinabi ito ni House prosecution legal spokesperson and counsel Benjamin “Jay” Tolosa Jr. kasunod ng testimonya sa impeachment trial ng testigong si Commission on Audit-Intelligence and Confidential Funds Audit Office supervising auditor Xylene Mae del Campo.
Diin ni House trial spokesperson at Kabataan Party-list Rep. Renee Louise Co, may sariling pondo ang VPSPG mula sa Office of the Vice President.
Base sa testimonya ni Del Campo, ginastusan ng confidential funds ang surveillance operations sa mga aktibidad at engagements ni VP Sara kabilang ang pagdalo sa mga inauguration activities, tree-planting, Christmas activities at iba pa.
Nagtataka din si House prosecution spokesperson Rep. Zia Alonto Adiong kung bakit kailangang gamitin ang milyun-milyong pisong halaga ng confidential funds para sa seguridad ni VP Sara sa Davao gayong ipinagmamalaki nila ang Davao ay pinakaligtas na lugar.
