Davao City – Giingong tungod sa kalisod sa panahon ilabi na ning epekto sa COVID-19 pandemic ang rason sa usa ka laborer nga nadakpan tungod sa pagpayuhot og iligal nga droga.
Apan gidimalas lang kay wala paman nakapanukad og maayo sa illegal nga kalihukan, nadakpan dayon si Ernesto Suico Jr., 41 anyos, minyo, ug nagpuyo sa Panacan ning siyudad atol sa buy-bust operation nga gikasa sa Buhangin Police Station.
Giingon nga wala nakamatikod si Suico nga mga sakop sa Station Drug Enforcement Unit sa Presinto 5, ang iyang gikasabot hinungdan nadakpan kini.
Kampante nga gitunol ni Suico ang usa ka sachet sa shabu sa otoridad nga nagtakuban isip buyer ug dihang gidawat sa suspek ang 500 pesos nga mark money, wala na maglangan ang mga pulis sa pagposas kaniya atol sa gikasa nga operasyon nga gipahigayon sa NHA, Barangay Buhangin bandang 7:30 sa gabii.
Gisaksihan sa usa ka barangay opisyal ug sa media ang gihimo nga inventory sa mga otoridad sa mga ebidensya nga narekober gikan sa dinakpan kinsa apil sa mga benepisaryo sa Social Amelioration Program sa DSWD-11.
Ang suspek mag-atubang og kaso nga may kalapasan sa section 5 ug 11 sa Republic Act 9165 kon Comprehensive Dangerous Drugs act of 2002.
RadyoMaN Joel Viray
