Mas pinasimple ng Land Transportation Franchising and Regulatory Board (LTFRB) ang proseso ng franchise renewal ng mga Transport Network Vehicle Service o TNVS.
Ayon kay LTFRB Chairman Vigor Mendoza II, awtomatikong iko-convert sa limang taong Authority to Operate Certificate (ATOC) ang mga umiiral at balidong Certificate of Public Convenience (CPC) ng TNVS.
Nakasaad ito sa Memorandum Circular 2026-049 na naglalayong pabilisin ang proseso ng franchise renewal.
Ibig sabihin, hindi na kailangang magsumite ng aplikasyon para sa renewal o motion for conversion ang mga kwalipikadong operator.
Gayunpaman, nilinaw ng LTFRB na hindi saklaw ng automatic conversion ang mga CPC na nag-expire, nakansela, nabawi, nasuspinde o nawalan ng bisa bago ipatupad ang naturang memorandum circular.
