Umaasa si House Deputy Majority Leader Rep. Lorenz Defensor ng Iloilo na hindi makikialam ang Korte Suprema sa Kongreso kaugnay sa proseso ng impeachment ni Vice President Sara Duterte.
Pahayag ito ni Defensor, kasunod ng isinampang petisyon ni VP Sara sa Supreme Court laban sa pag-impeach sa kanya ng kamara.
Ayon kay Defensor na isa sa mga miyembro ng 11-man House prosecution team, ang impeachment ay political question kung saan dapat pairalin ng Supreme Court ang “judicial restaint” o hindi panghihimasok.
Diin pa ni Defensor, 215 mga kongresista ang lumagda sa impeachment complaint laban sa bise president na higit pa sa required na 103 o 1/3 ng mahigit 300 miyembro ngayon ng mababang kapulungan.
Panawagan nina Representatives France Castro, Arlene Brosas at Raoul Manuel ng Makabayan Bloc sa Kataas Taasahang Hukuman, hayaang manaig ang due process at pagpapatuloy ng impeachment trial na nakabatay sa konstitusyon upang manaig ang pananagutan.
Sabi naman ng isa pang miyembro ng house prosecution team na si Batangas Rep. Gerville Luistro, walang batayan para mag-isyu ang high tribunal ng temporary restraining order sa impeachment complaint dahil walang depekto ang verification process dito at umaayon ito sa constitutional requirements.
