NCR, naabot na ang mga target na nilatag sa ilalim ng PinasLakas Vaccination Campaign

36

Naabot na ng National Capital Region (NCR) ang target na nilatag ng Department of Health (DOH) para sa PinasLakas Vaccination campaign.

Batay sa datos ng DOH-Metro Manila Center for Health Development (MMCHD-DOH), higit 90% ng mga senior citizens sa NCR ay fully vaccinated na kontra COVID-19 habang nasa 50.04% ng eligible population ng rehiyon ang naturukan na ng booster shot.

Sa kabila nito, inihayag ni MMCHD-DOH Assistant Regional Director Dr. Aleli Sudiacal na patuloy pa rin ang kanilang pagbabakuna dahil nakikita na muli ang pagtaas ng kaso ng COVID-19 sa rehiyon.


Sa kabila nito, nilinaw na isang rehiyon pa lamang ito at malayo pa sa vaccination target ang maraming rehiyon sa bansa.

Unang itinakda ng DOH sa 50% ang target ng booster coverage pagsapit ng October 8 ngunit ibinaba kalaunan sa 30% bunsod ng mababang turnout nito.

Samantala, patuloy na nakikita ng World Health Organization (WHO) ang pagbaba ng mga namamatay sa COVID-19 sa buong mundo kung saan mula sa 11,000 na naitala noong September 5 hanggang 11 ay bumaba na ito sa 9,800 nitong September 12 hanggang 18.



Facebook Comments