Isinagawa ng Bayambang Municipal Nutrition Action Office o MNAO ang Overweight and Obesity Prevention Program sa Inirangan-Reynado Elementary School at Catalino Castañeda Elementary School noong Oktubre 21 at 22, 2026.
Layunin ng programa na palawakin ang kaalaman ng mga kalahok tungkol sa wastong nutrisyon, malusog na pamumuhay, at kahalagahan ng regular na pisikal na aktibidad upang maiwasan ang sobrang timbang at obesity.
Binigyang-diin sa mga talakayan ang pagpili ng masusustansiyang pagkain, sapat na pag-inom ng tubig, at paglilimita sa pagkonsumo ng mga pagkaing hindi mainam sa kalusugan.
Kabilang sa mga tagapagsalita sina Ms. Josie E. Niverba, RSW, na tumalakay sa kalusugang pangkaisipan, at Ms. Imelda de Guzman, na nagbahagi ng kaalaman tungkol sa pamamahala ng obesity gamit ang gabay na “Pinggang Pinoy.”
Naging bahagi rin ng programa ang mga larong Pinoy upang hikayatin ang mga kalahok na maging aktibo at isabuhay ang malusog na pamumuhay.
Sa pamamagitan ng programang ito, hinihikayat ang publiko na panatilihin ang wastong gawi sa pagkain, regular na pag-eehersisyo, at iba pang gawaing makatutulong sa pagpapanatili ng mabuting kalusugan at pag-iwas sa mga panganib na dulot ng sobrang timbang at obesity. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
