Patay sa linog sa Davao Region, misaka sa 4 – OCD XI

Davao City – Misaka na sa upat ang kumpirmadong namatay tungod sa kusog nga linog nga miigo sa Davao Region, sumala sa pinakabag-ong datos gikan sa Office of Civil Defense (OCD) XI.

Gikumpirma ni OCD-XI Information Officer for Operations Ezzra James Fernandez nga padayon pa ang pag-validate sa ubang report sa mga apektadong lugar.

Tulo sa mga namatay gikan sa Balut Island, Davao Occidental. Usa ka biktima ang namatay human matabunan sa nahagsang istruktura sa Brgy. Mabila, samtang laing usa ang namatay ug lima ang nasamdan sa Brgy. Patuco tungod sa earthquake-induced landslide. Usa pa ka biktima ang nakabsan sa kinabuhi sa Brgy. Konel human matabunan sa nadaot nga mosque.

Samtang, usa usab ka casualty ang natala sa Digos City, Davao del Sur, nga maoy nadugang sa ihap sa mga namatay ngadto sa upat. Nagpadayon karon ang mga awtoridad sa assessment ug paghatag og tabang sa mga apektadong komunidad human sa maong kalamidad.

RadyoMan Kareen Beltran