PNP-Malaybalay, mipahimangnu sa katawhan nga magmaigmat kabahin sa extortion nga ginahimo pinaagi sa tawag

31
Mipahimangnu karon ang Malaybalay City Police Station ngadto sa publiko nga magmaigmat sa mga ginahimo nga extortion kon pagpangilkil pinaagi sa tawag ug i-report gilayon sa kapulisan.

Sa interview sa RMN Malaybalay ngadto kang Police Executive Master Sergeant Alexander Calma, incharge sa Police Community and Development section sa Malaybalay City Police Station, gipanawagan niya ngadto sa katawhan nga makigkoordinar gilayon sa kapulisan kung makadawat og tawag sa mga tawo nga nagpailang miyembro sa walhong grupo ug mangilkil kon mang-extort.

Dugang pa ni Calma nga aduna nay gipahigayon nga consultative meeting ang kapulisan kauban ang mga staff sa usa ka tulunghaan diri sa siyudad nga nakadawat gihapon og tawag sa pagpang-extort.

Gibutyag ni Calma nga ubay-ubay na nga mga report ang ilang nadawat kabahin niini apan sa karon gina-imbestigahan pa ang maong pagpangilad aron nga mapaagi sa entrapment operation.

Sa milabayng mga katuigan sumala pa aduna na silay nangadakpan kabahin sa maong insidente diri sa siyudad sa Malaybalay.

Paghangyo usab niya ngadto sa mga gapahigayon sa maong pagpangilad nga likayan ang maong buhat tungod kay wala kini’y maayong padulngan ug posibleng muresulta kini sa pagka-aresto kung mapamatud-an.

Facebook Comments