Sinita ni Senator Imee Marcos na nasa 12 secretaries ang kasalukuyan pa ring nasa acting capacity gayong nagsimula na ang Kongreso sa budget season.
Sa budget hearing para sa P7.2 trillion na 2027 national budget, pinuna rin ni Sen. Imee na maging ang kalihim ng Department of Budget and Management (DBM) na si Sec. Kim Robert de Leon na kasalukuyang dumidepensa sa 2027 NEP ay nasa acting capacity pa rin ngayon.
Idiniin ng senadora na humahawak sila ng mahahalagang posisyon sa gobyerno pero wala silang discretionary o personnel movements na maaaring gawin dahil nasa acting capacity lang o mga hindi pa nakukumpirma ang mga ad interim appointments.
Nababahala si Sen. Imee kung papaanong matutugunan ang krisis sa buong mundo kung 12 sa mga myembro ng gabinete ay nasa acting capacity at limitado lang ang mga pwedeng gawin.
Tinukoy ng mambabatas ang mga secretaries na kasalukuyang nasa acting capacity —- Executive Secretary Ralph Recto, Department of Public Works and Highways (DPWH) Sec. Vince Dizon, Department of Transportation (DOTr) Sec. Giovanni Lopez, Department of Justice (DOJ) Sec. Fredderick Vida, Department of Finance (DOF) Sec. Frederick Go, DBM Sec. de Leon, Department of Environment and Natural Resources (DENR) Sec. Mitch Cuna, Department of Health (DOH) Sec. Edwin Mercado, Presidential Communications Office (PCO) Sec. Dave Gomez, Department of Labor and Employment (DOLE) Sec. Francis Tolentino, Bases Conversion and Development Authority (BCDA) President and CEO Joshua Bingcang kasama si BCDA acting board member Dante Liban.
