Pormal nang sinimulan sa Rehiyon 1 ang Service Contracting Program bilang bahagi ng patuloy na pagpapalakas at pagpapaunlad ng pampublikong transportasyon sa bansa.
Sa ilalim ng programa, nagbibigay ang pamahalaan ng subsidiya sa mga operator at drayber upang matulungan silang maipagpatuloy ang kanilang hanapbuhay sa gitna ng patuloy na pagtaas ng presyo ng produktong petrolyo. Kasabay nito, nakikinabang din ang mga pasahero sa mga diskwento sa pamasahe na ibinibigay sa ilalim ng programa, kabilang ang mas mataas na benepisyo para sa mga senior citizen, persons with disabilities, at mga estudyante.
Inaasahang madaragdagan pa ang bilang ng mga sasakyang pampubliko na sasailalim sa naturang inisyatiba upang mas mapalawak ang saklaw ng serbisyo sa iba’t ibang lalawigan sa rehiyon.
Patuloy ring pinagtitibay ang koordinasyon sa pagitan ng mga kinauukulang ahensya, lokal na pamahalaan, at mga transport group upang matiyak ang mas maayos, episyente, at maaasahang sistema ng pampublikong transportasyon.
Sa kabuuan, layunin ng programa na mapanatili ang tuloy-tuloy na operasyon ng transport sector habang tinitiyak ang abot-kaya, ligtas, at episyenteng biyahe para sa mga pasahero. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
